نيل شبه الجزيرة

ارعدي يا مخايل وامطري واسقيه
نجد كله وخص طويق وجباله
فيه منا عزايمنا ومنا فيه
قالها سيدي من عرض ما قاله
كل قولٍ يقوله سيدي يعنيه
يوم وصف طويق بهمة رجاله
يوم قال استعدوا ما نشدنا ليه
واثق من ولانا له وحنا له

أبو سلمان يامر وأمره نلبيه
لو يبينا نشيل طويق نشتاله
شاف فيه الملك سلمان ما يرجيه
حاكمٍ تستظل العرب بظلاله
لا التفت في محمد شاف جدّه فيه
كأن أبو تركي معزي يورى له
كأن محيي العظام الباليه محييه
وأشهد إنه تخير جدّه وخاله

منطقه زاد فكر ونظرته توجيه
معجزة عصر يكفي شرح وإطاله
نيل شبه الجزيرة ودي أسميه
من حداه الظمى ينزل على جاله
جعل ربي يبارك فيه ويخليه
ما تناوش من نجوم السماء طاله
يعمد المستحيل ولا أحدٍ يثنيه
كل ما صعب شيٍ شرب فنجاله

هو طموح الشباب وعزه وبانيه
‫واتحدنا وراه وحالنا حاله
وإن حسدنا العدو جعل العمى يعميه
ما شحنّا وفال الله ولا فاله
لا يقدر وجيه ولا يحشم وجيه
وأظهر الحقد كل اللي على باله
ينتقد من تصوغ المعجزات يديه
وهو يده ترتعد من عروة بياله

علموا من هرج في شي ما يعنيه
كل أبونا مع محمد ونبرى له
كل أبونا محمد والعهد نوفيه
نرخص الروح دونه ماهو لحاله
سر بنا يا ولد سلمان لا ترضيه
في نجاحك عمى الحاسد وسلاّله
إنت يغليك شعبك مثل ما تغليه
إحتمى الشعب فيك وعلق أماله