صغري أنا
آ يا ليلي آ
الحكاية بدات بضبط أفريل عام ثمانين
جيت للدنيا نبكي بين ضحكة الوالدين
كبرت وتربيت وتعلمت نقول حروف
مرة ضحكت مرة بكيت مرة كليت الحلوى ومرة كفوف
مازلت كيف جديد المخ نظيف
كيما اليوم الدنيا ربيع ما في بالشي غدوة تولي خريف
أول ما جيت البو يحمل والأم تبوس
مازالوا ما عنديش ضروس حتى يطلع فيها السوس
صغير ودلول مرة ملايكة ومرة شيطان
ما نعرفشي الحرام مازلت بالدنيا فرحان
نعرف الشر كان في الكوميك وفي الأفلام
ما نعرفشي إلي الشر كيما الخير مخبي مع الأيام
لعبنا كرة لعبنا بيس وزربوط
كتبنا على مراولنا بالستيلو نوامر جوورات الفوت
كنت طويل ديما نمركي بالراس
في حومتنا ما لعبنش تنيس كيما بيت سامبراس
سرقنا الغلة من ديار الجيران
عرفنا اللي السرقة حرام هذا اللي جا في القرأن
مازلنا صغار ومازالت الدنيا بخير
حلمت كي نكبر نولي أستاذ طبيب ولا مدير
قلوبنا صغار أما قلوب بيوض ونظاف
بابا كي يحكي لي على جهنم والجنة نفرح أما نخاف
تعلمنا نطيعوا والدينا نمدوا أذنينا للكبار
تعلمت نكون مرة عاصي ومرة بار
عرفنا الدين هو الإسلام كي نسلم نقول السلام
نصدق وما نكذبشي كي نقول كلام
مشينا نصليو كي سمعنا حي على الفلاح
والدينا فرحوا بنا قالوا ولادنا من الصلاح
صغري أنا
L'enfance qui a passé avec les jours
J'ai tellement envie de retrouver l'amour que j'ai perdu
(عمري أنا (عمري أنا
Des souvenirs qui sont passés sans retour
Sentiment que j'ai tout perdu, ça fait mal et je l'avoue
يا ويلي آه
مشينا نقراو وعرفنا غصرة الإمتحان
الإبتدائي تعدى كادوات النجاح العام ورا العام
صغار تعاندنا شكون يجيب أحسن الأعداد
شكون يجيب الشهادة شكون فينا غدوة مستقبل لبلاد
كنا نقراو خريف وشتا، شتا و خريف
بش كي ننجح بابا يخليني نمشي للبحر في الصيف
الصيف يتعدى بين الحومة والبحر
في القوايل تعاركنا حومة كونتر حومة بالحجر
مرة مدموغ مرة طايح مرة مضروب
مرة غالب مرة مغلوب مرة هارب من كلب مكلوب
مرة ضحكت كي تفرجت في شارلو
مرة بكيت كليت طريحة بش ما عادش نتشعبط في البوتو
تسعة وثمانين عمري تسعة سنين
نحب نعمل شعري بالجال نلبس سيني اديداس ودجين
مازلت صغير أما نحب نعاند الكبار
نمشي لديسكوتيك كما خويا ونولي سهار
حبيت مزيكة الكحالش الأمريكان
نحب نفهم الكلام وليت نتنفس راب مع الأوكسجن
صدقني نضحك كي نتذكر الأيامات
بابا ما يعطنيش فلوس نولي نمشي نسرق كستت
من إم سي هامر لسنوب دوغي دوغ
هيب بوب هردكور متع لانسيان إيكول
نسرق و نخبي لين مرة تشديت
كليت الكف بكيت كي سيبني سبيته وهربت جريت
عمري حداشر سنة جيغا نوم دي كود
لبست دجين بوغار وقتلي كان ألا مود
لبست كليت حزين فرحان
كبرنا مع الأيام وكبر معنا الشيطان
صغري أنا
L'enfance qui a passé avec les jours
J'ai tellement envie de retrouver l'amour que j'ai perdu
عمري أنا
Des souvenirs qui sont passés sans retour
Sentiment que j'ai tout perdu, ça fait mal et je l'avoue
يا ويلي آه
أ ويلي يا
خذيت السيزيام دركسيون لليساي
برميار انيي عاودت وراها برميار انيي
كنت نقطع مل لقراية ونجيب سرتفيكا
صحابي تقرا في الكلاس وأنا فين في السينما
مرسكي في الكار دركسيون سنتر فيل
في المرواح دركسيون حومتي قبل ما يطيح الليل
فاقوا بي الدار كليت الضرب لين فديت
جاني جواب مل لساي عشرين يوم ما مشيتش قريت
ثلطاشر سنة عمري غرامي ولا سبور
باسكت بول شاكيل أونيل مون ايدول
تعلمت نشوط ندريبل ونحط الكرة في الباني
خمستاش سنة واللي نزمتشي سون بيتي
سبورتيف شامبيون في الباسكت
الانتوراج ما يشجعشي عطاني ماديل دور في الفساد
تكيفت وأنا صغير سيغارو مع كل بوز
الدنيا كحالت من الدخان ملي كنت نشوف الدنيا روز
ولينا شلة وحدة أنا وأصحاب السوء
الهملة والفساد زيد السرقة من السوق
الراس فوق الأكتاف رزن مل لالكول
أصحابنا تقرا في العلوم وإحنا نشمو في شكاير الكول
وسخت كتاب نظيف لين جاء الصيف
جاتني آخر بلتان في حياتي مطرد دفنيتيف
الأيام جرات صغري بقى ذكريات
اليوم فما ندم اليوم فما حسرة ع اللي فات
سامحني أمي سامحني بابا ولدك طاش
سامحني ربي إذا عبدك ما طاعش
ستة وعشرين صغري وفا في العشرين
إذا اليوم الفم يضحك أعرف راهو القلب حزين
صغري أنا
L'enfance qui a passé avec les jours
J'ai tellement envie de retrouver l'amour que j'ai perdu
عمري أنا
Des souvenirs qui sont passés sans retour
Sentiment que j'ai tout perdu, ça fait mal et je l'avoue