Meierysli

Es het einisch e Zyt gäh, i bsinne mi draa
Wo mir ejnigi Gfühl für enanger hei gha
E so Gfühl hei s grad wie d Meierysli im Wald
We dr Wind chunnt cho blase, de vergange sie bald

Mal im Summer, grad juscht, am ne Waldfescht isch s gsy
Woni s gseh ha bim Tanze, da laden i s yy
Wien äs mir schöni Ouge het gmacht dert im Wald
We dr Wind chunnt cho blase, de vergange sie bald

Mir sy druuf, wo dr Tanzbode wäggruumt isch gsy
U wenn d Amsle hei gsunge, no mängisch dert hii
Hei ys Liebeserklärige gmacht dert im Wald
We dr Wind chunnt cho blase, de vergange sie bald

Aber Herbscht isches worde, s’isch nass gsy und chalt
Mir hei Gspräch gfüehrt ir Stube, sy nümme i Wald
Mit so Gspräch chöme Kräch, so dass d’Liebi do gly
Wo dr Wind isch cho blase vergange isch gsy

Es het einisch e Zyt gäh, i bsinne mi draa
Wo mir ejnigi Gfühl für enanger hei gha
E so Gfühl hei s grad wie d Meierysli im Wald
We dr Wind chunnt cho blase, de vergange sie halt