Emigraos

[Verse 1: MOMAK]
Partian dae sas biddas pro chircare fortuna in foras
In chirca de una opportunidade, unu crasa, una vida nova
Lassavan chin dispiachere cust' isula pro terras istranzas
A istichidura in naves prenos de isperanzias
Moghiana in pare rucravan su mare
Chin d'unu billete de solu andada et sa promissa de torrare
Gai comente una mama cresche fitzos chin amore
Sa Sardigna no s'irmentica de unu fitzu minore
Viviant in povertade traballavant a dischissiu
Ma s'issoro dignidade baliat cada sacrifissiu
In d'unu locu isperdiu fritu chene sos afetos
Postos a banda e bene cusserbaos in sos amentos
Bi viant mamentos, in ube su sole essiat a campu
Ma s'abba de cussu chelu cando proghiat pariat prantu
Comente una ischinzidda chi allughet unu mannu focu
S'istoria de cussa zente appartenit a custu locu!

[Verse 2: KINGAIE’]
Ant connotu sos dolos de sa gana e sa povertade
Chin malas annadas, e in sa note s’iscuridade
Cussos longos e fritos iberros de nibe e bentu
Battire su recattu fit su solu pessamentu
Pro totu cussos pastores chi iuchiana unu masone
Paschiana cuforma a sa leze antica ‘e sa cumone
Zent’umile abituada die pro die a si la gherrare
Mancàri a bortas fit tosta, resessire a campare
E babbu chi dae minore custa bida at connotu
Comente atteros sardos est partiu lassande totu
C’a su miseru balanzu chi intrabat dae sa campagna
Non dabat sustentu in cuddos tempos de sicagna
Sos fitzos de cust’isula ant sempere sufertu
Chenze mai si pinnicare coment’unu arbore de chercu
E custa est dedicada a totu cussos emigraos
Partios in terra anzena e chi mai prus sun torraos!

[Rit.]
Su chi appo, chi tenzo e disitzo, est totu inoche
In custos ammentos e bisos, in custa boche
Chi contat contos e istorias cantat poesias
Chi sarbat anticas memorias pro sas zenias
Tramudat su dolu e s’anneu in s’isperanzia
E pregat a sa gratzia de deu pro s’abbundanzia
Abratzat sos coros in pena e iscuffortaos
De sardos in terras anzenas… emigraos!

[Verse 3: MOMAK]
Istringo in manu una betza fotografia de jaju meu
Unu sordau emigrau ghirau gratzias a deus
Chi'n sa mente torro in palas a sos contos chi mi contavat
Sas poesias chi mi leghiat sas cantones chi mi cantavat
Duos ocros de chera chi cubabana su dolu
De chie est moghiu in cumpantzia ma est depiu torrare solu
In custa terra domo de tottu sos emigrantes
In ziru pro su mundu ma chi'n su mantessi sambene

[Verse 4: KINGAIE’]
Duos ocros chi pranghene lagrimas de amargura
Non resessin a cubare unu coro prenu ‘e tristura
Chi no atzapat pasu e trazzat su pesu de custa bida
In arziada dae trumentos e afanos tribulada
In cada locu 'e su mundu nazione bidda o tzitade
B’at un amicu corale b’at una sorre e unu frade
Partios dae sa Sardigna suta unu chelu iberrile
Lassande una mama sola in dae nantis a su fochile!

[Rit]
Su chi appo, chi tenzo e disizzo, est totu inoche
In custos amentos e bisos, in custa boche
Chi contat contos e istorias cantat poesias
Chi sarbat anticas memorias pro sas zenias
Tramudat su dolu e s’anneu in s’isperanzia
E precat a sa grassia de deu pro s’abundanzia
Abratzat sos coros in pena e iscufortaos
De sardos in terras anzenas… emigraos!