Heit stelln ma an Maibaum auf! (Lustiges bayerisches Kinderlied zum 1. Mai)

Is des a Glück! Heit stimmts genau
Aa grad heit is da Himmel ganz blau
Heit haun si de Kloana wia de Großn
Ins Dirndl und in de Lederhosn

De Lehrerin kimmt aa mim Dirndl o
Obwohls net amoi richtig Boarisch ko
Da Hias trogt an Gamsbart zum Trachtngwand
So groß, dass ma damit glei zamkehrn kannt

Juhui! Eiei! Heit is da erste Mai!
Heit gehts los, heit gehts auf! Heit samma so guad drauf!
Heit stelln ma an Maibaum auf!
Heit gehts los, heit gehts auf!
Heit samma so guad drauf!

Musi spui auf!

Da Maibaum, ja mei, des is scho a Lackl
Doch unsere Burschn san a scheene Brackl
De stemman des Hoiz, da staunan de Madln
Grad übern Sepp mit de Spatzn-Wadln

Auf gehts, Buam! Schiabts a bisserl no
An Ruck! Jawoi! Jetz steht er do
Wer rennt glei als Erste zum Würstlstand?
D‘Burgermoasterin im Dirndlgwand

Juhui! Eiei! Heit is da erste Mai!
Heit gehts los, heit gehts auf! Heit samma so guad drauf!
Heit stelln ma an Maibaum auf!
Heit gehts los, heit gehts auf!
Heit samma so guad drauf!

Musi spui auf!

Nachm drittn Gang zum Kuachastand
Schaut d‘Huaberin, als obs nimma schnaufa kannt
Die Schützen, de schiaßn auf oamoi so laut
Dass d’Oma fast von da Bierbank haut

Da Pfarrer trinkt heit a ganze Maß
Heit is er lustig, heit hot er Spaß
Am Tisch obn stehn de Goaßl-Schnalzer
Und schnalzen uns jetz glei an Maibaum-Walzer

Heit gehts los, heit gehts auf!
Heit samma so guad drauf!

Musi spui auf!