Oans, zwoa und drei! (Bayerisches Volkslied für Kinder mit neuen Strophen)

Oans, zwoa und drei, oid is net nei
Nei is net oid und warm is net koid – koid, koid
Koid is net warm und reich is net arm
Arm is net reich und alle san net gleich

Oans, zwoa und drei, boid is net glei
Glei is net boid und jung is net oid – oid, oid
Oid is net jung und gscheit is net dumm
Dumm is net gscheit, aber des huift net weit

Oans, zwoa und drei, a Brot is koa Brei
A Brei is koa Briah und a Kuah is koa Stier
A Stier hot koa Radl und a Spatz hat koane Wadl
Wadl hamma scho, do samma aber froh

Oans, zwoa und drei, a Hund frisst koa Hei
A Hei is koa Gras und a Fuchs is koa Has
A Has is koa Reh und a Schwimmbad koa See
Oa See hoaßt Chiem und der ander hoaßt Sim

Oans, zwoa und drei, heit hob i frei
Frei is net zwider und auf is net nieder
Nieder is net hoch, a Berg is koa Loch
A Loch is koa Knopf und Du bist koa Tropf

Oans, zwoa und drei, der März is koa Mai
Da Mai is koa Juli und a Bleistift koa Kuli
A Kuli is koa Bladl und a Bua is koa Madl
A Mo is koa Frau, jetz wiss mas genau

Oans, zwoa und drei, kimmst heit vorbei
Vorbei is net drin und her is net hin
Hin is net her, leicht is net schwer
Schwer is a Bus, jetz is aber Schluss