All die Aureblecke

Fünf Uhr morjens un en Katz läuf övver‘t Daach
Eezte Strooßebahne, koote Sommernaach
Cargo-Fliejer starte immer noch enn Wahn
Trucks uss Almeria kumme endlich ahn
Un do, ‘ne Jüterzoch,
En Siren, Ambulanz oder Schmier
Ach ja, Duuve gurre och
Un minge Hungk dräump, dat e‘ jefährlich wöhr

Jeht klar, kein Frooch – et ess alles okay
Och die kostbarste Momente jonn vorbei
Schon klar, doch – hey – dat deit nit ens wieh
All die Aureblecke nimmp mir keiner mieh
Janz bestemmp, die nimmp mir keiner mieh

Sick ich denke kann, wohr alles Rock’n‘Roll
Alles uss der Hüfte, ohne Protokoll
Ohne Kompass, he un do ‘n verbrannte Bröck
Volles Rohr un kein Jefangne, kei Zoröck
Ja klar, einiges jing schief,
Ävver wat heiß dat schon? Dat wohr dä Deal
‘t ess wohr, wat letzendlich blieht
Da‘ ‘ss die Jewessheit: Dä Wääsch ess et Ziel

Jeht klar, kein Frooch – et ess alles okay
Och die kostbarste Momente jonn vorbei
Schon klar, doch hey dat deit nit ens wieh
All die Aureblecke nimmp mir keiner mieh
Janz bestemmp, die nimmp mir keiner mieh

Manche Aureblecke verjisste nie
Die sinn wie Fotos uss der Holographie
Schlaach dä Rest bei Aristoteles noh
Schlaue Mann, schon vüür mieh als zweitausend Johr
Janz bestemmp

Nä, nä, kein Frooch et ess alles okay
Och die kostbarste Momente jonn vorbei
Schon klar, doch – hey – dat deit nit ens wieh
All die Aureblecke nimmp mir keiner mieh
Janz bestemmp, die nimmp mir keiner mieh